Tuesday, October 7, 2014

Со Тони Зен за хип хоперските работи, врвовите и созревањето

Ми текнува на „Интелект“, поточно на видео спотот за оваа песна. Во најмала рака интересно направен видео спот (нешто ново и поразлично на тогашната домашна музичка сцена), а телевизијата уште еднаш се потврди како моќен медиум преку кој јас разбрав за Тони Зен.
Пет албуми. Два на „Урбана Димензија“, и три на Тони Зен. Последниот албум на Тони Зен со назив „Микро скопски организми“ е промовиран некаде во Октомври 2013. На овој албум се наоѓа „под контрола“.
Оваа песна е изненадување за мене. Не очекував дека некој со толкава присутност на нашите медиуми и популарност ќе направи песна преку која ќе пренесе видување, а резултатот од тоа ќе биде како да си ја сечеш гранката на која седиш. Се појави песната и спотот (а во оваа прилика би ги спомнал и песните „Назад“, „Зошто?“ и „Добродојде“ од истиот албум), доби награда за најдобар спот на „Златна Бубамара на популарноста“ и Тони Зен го снема... медиумски.

Што му се случи на Тони Зен па направи нешто како „под контрола“? Од песни за маалото, улицата, „лошите девојки“, конкурентските хип хоп бендови, пријателите од Ново Лисиче (будало) и Лупус, направи песна што од main stream популарноста го вратија во маргиналната хип хоп суб-култура на источната периферија од главниот град, што на крајот на денот е во суштината на Хип-Хоп-от.

ЈАС: Што му се случи на „Суперзен?

ТОНИ ЗЕН: Суперзен ја исполни мисијата, ја заврши неговата работа. Еволуираше и премина во микроскопски организам.

ЈАС: Микро скопски организми“ според моите скромни аудио инженерски познавања има одлична техничка реализација (нема да спомнувам дали лично мене ми се допаѓа семантиката на тој производ), а сепак неговата промоција и медиумска покриеност не беше и не е како онаа за „во мој стил“.
Ги држам в рака двата албума (а што да правам и јас патам од соништа иако имам редовна несоница – www.muzichkiregistar.com) и „во мој стил“ издаден за „Јованов Рекордс“ и „Микро скопски организми“ на „СТ продукција“ и ги разгледувам. На првиот наредени лого типови од неговите поддржувачи, трипати повеќе од овој вториот.
Добро го знам чувството кога нозете ти се враќаат назад кога наутро одиш на работното место во кое би фрлил бомба. Што е тоа што тебе ти ги враќа нозете од врвот, ако твојата работа значела искачување на музичкиот врв во Македонија!? Што осети ти на своја кожа за потоа да внимаваш постојано? Селска приредба?! за која говореше и Столе Попов неодамна на и за филмскиот фестивал „Браќа Манаки“! Тоа ли е чувството на „врвот“?


ТОНИ ЗЕН: „Микро скопски организми“ според мене е мојот прв албум затоа што пред се претставува идеја позади која има концепт, за разлика од претходните. Медиумската помпа за овој албум не постои затоа што јас така одлучив. За претходните албуми имаше многу повеќе маркетинг затоа што бев со продукциски киќи, а овој пат сè беше направено во сопствена режија и немав никаква продукција позади мене и моите ставови. Стерео рекордс (stereo records) на Нино Васков помогна за реализација на албумот, а „СТ продукција“ за издавањето.
Кога созреваме воедно и се будиме и сонот за искачување на некаков врв завршува. Сме се искачиле, сме виделе што има горе, сме ги осетиле на кожа сите пречки, се враќаме доле и раскажуваме како било. Освојувањето на таквиот врв за мене е една илузија, игра и визуелизација внатре во умот што излегува и надовр од него за да видат останатите битија што сум „крпел“ во подсвеста. Но сето тоа е потреба на егото.
Вистинскиот јас ги сака вистинските природни врвови и е на пат да ги посетува и биде во хармонија со нив.

Слаткарот им се обрати на најмладите со песната
„Дими Џам“, па им се извини за непристојноста
додека овие го гледаа со восхит, веројатно неразбирајќи
за што се работи.

ЈАС: Конкурираше на програмата на Министерството за култура преку која се стимулира креирање музички дела што промовираат семејни вредности и многудетни семејства (Се прашувам, како ли јас со моите аматерски електро инструментали да се изразам за да докажам дека си ги сакам двете деца и жената и дека се трудам да ги научам на вредности што ќе им помогнат да учествуваат во градење на здраво општество, па и јас да соберам нешто ситни народни пари?).
Колку што прочитав во еден пишан медиум те одбиле? Со кои песни конкурираше на оваа програма? Минатиот викенд имаше некаков настан во градскиот парк на кој се дереа преку разгласот и повикуваа да правиме многу деца, а од кога си отидоа гласноговорниците се качија на бина дел од актуелните изведувачи, меѓу кои и другар ти Слаткарот. Тој им ја изрецитира Дими Џам“ на собраните дечиња како поддршка на настанот што требаше да ги промовира семејните вредности и многудетните семејства. %-o (За воља на вистината, Слаткарот скоро да се извини за песната. Кажа дека да знаел дека ќе имало многу деца, немало да ја пее таа песна. Дали воопшто им кажуваат каде ќе настапуваат и што е поводот, а артистиве изгледа не ни прашуваат каде треба да настапат и пред кого? Или ништо од тоа не е важно? %-o Што вели Чорба, важно је само добро се зезати)
Ова ли е врвот што во моментов го ужива Тајзи од кој ти се врати назад па им пренесуваш искуство на останатите и ги одвраќаш од „врвот“? Има ли некој нормален у контрола на квалитет што нешто гледа, таму на „врвот“?
Се надевам децата не успеаа да разберат многу од песната на Слаткарот што BTW е фантастична според мојот вкус, а и искрена е, од срце, тоа секогаш се препознава. Барем така ја чувствувам јас, за разлика од онаа „Среќа“. (што велат во Струмица: „НЕ БИВА!“)

ТОНИ ЗЕН: За конкурост, несакав да конкурирам меѓутоа блиските пријатели и соработници ме убедија дека треба да го сторам тоа затоа што заслужувам некој денар од ваквите проекти, за кои лично сметам дека требаше одамна да им текне да ги направат и да ги поддржат музичките артисти на ваков начин. Јас не добив ништо, најверојатно затоа што има други пред мене во редот кои се побитни, но мене тоа не ми пречи. Повеќе ме загрижува сознанието дека има многу квалитетни млади алтернативни артисти кои неможат да скрпат ден за ден и неможат да бидат слушнати и видени, а ја сакаат музиката и уметноста. Мислам дека на тоа треба да се обрне повеќе внимание, а не со ваква помош да се помага на веќе популарните музики изведувачи.

Што се однесува до настанот на кој што си присуствувал, неможам да дадам мислење освен тоа што можам да ти кажам дека сум учествувал на еден куп такви настани и знам како му е на Марко и на Тајзи, тоа е. Такви настани имало и ќе има, артистите на таквите собиранки и пропаганди се само алатка за да ја анимираат публиката.

ЈАС:  Кој води на оваа денешница? Западна „обала“ (Легијата и целата нејзина декомпозиција) или источна „обала“ (Токсикологија и сите фракции)?

ТОНИ ЗЕН: За ова прашање треба да се направи една анкета меѓу народот. :) Мислам дека за такви податоци не се замара ни едната ни другата „обала“. Ние само сакаме да создаваме песни и да ги пласираме во јавност. Целта ни е да се прошири муабетот за хип хопот како урбана суб-култура, без разлика кој води или кој е подобар или кој има бољи траки. Сепак мислам дека заедничката цел е остварена, хип хопот го има за секого и насекаде.

ЈАС:  Навистина ли мислиш дека сите сме исти!?

ТОНИ ЗЕН: Да, исти хибриди. Исти биолошки компјутери само различно програмирани.

ЈАС:  На последниот албум „Микро скопски организми“ автор си на музиката и аранжманот на неколку песни. Што користиш од инструменти и алатки за создавање на музиката?

ТОНИ ЗЕН: Основната идеја ја поставувам во Acid на Sony, па после сето тоа се префрла во Cubase во студиото кадешто се снимаат вокалите, па се микса и се прави мастеринг на песната. Тоа е веќе работа на музичкиот продуцент кој е одговорен за финалниот звук на песната. Јас употребувам исклучиво семплови, додека музичкиот продуцент на „Микро скопски организми“ Нино Васков користи исклучиво инструменти.

ЈАС: Зошто повеќе не постои www.tonizen.mk? Профилот на Facebook треба да е негова замена? Дали знаеш дека од 1-ви Ноември годинава Facebook планира да почне да наплатува за корисниците (околу 3 долара месечно). Ќе имаш ли тогаш Facebook профил ако тоа се случи или !?

ТОНИ ЗЕН: Во модерно време ретко кој артист има интернет страница. Испадна дека е трошок па ај сите гага профили или фан бази на Facebook, Instagram, Twitter и така натака. Доколку се наплаќа и Facebook, ќе се појави нешто ново што е бесплатно па најверојатно сите ќе се „преселат“ таму. :) Незнам што да мислам за ова, искрено. Најверојатно ќе најдеме начин и пат како да стигнеме и допреме до луѓето.

ЈАС: Дали доколку има локален сервис што ќе продава музика во дигитален формат(MP3) би склучил договор со сервисот за да се продава твојата музика? (Веруваш ли дека вреди да се направи таков договор? Дали мислиш дека некој би купувал MP3-ки во оваа наша државичка а и нашата дијаспора кога знаат дека може да ги најдат за џабе?)

ТОНИ ЗЕН: Се ќе направам само да знам дека пораката што ја испраќам ќе допре до масата. :)

ЈАС: Кога последен пат си купил музички медиум од некој свој колега музичар?

ТОНИ ЗЕН: Обично си ги разменуваме албумите, ретко кој купува. :)

ЈАС:  Дали професионално се бавиш со создавање музика и изведување? (Дали заработуваш за живот од тоа?)

ТОНИ ЗЕН: Сега за сега заработувам и живеам само од тоа и сметам дека мојот пристап кон музиката, кон нејзиното создавање и изведување, од секогаш бил професионален.

ЈАС: Ако навистина постои „Суперзен“ и може да го врати времето како што тоа го направи Супермен, дали повторно би ја издал „под контрола“ со спотот?

ТОНИ ЗЕН: Би ја направил, само со поинаква музика и уште поквалитетен спот. :) Второто продолжение од „Под контрола“ веќе постои и се вика „Прљаво на Балкан“ заедно со Сиги. Исто така се спрема и видео спот.


Дополнителни ресурси што би можеле да ви бидат интересни:

Friday, August 8, 2014

Аполонија Мармаладова

Еден расказ „Аполонија Мармаладова“ од лектира за трето одделение.

книга: Приказни по телефон
автор: Џани Родери

 
Во Сант Антонио, на езерото Маџоре, живеела една женичка која толку убаво умеела да прави мармалад, што нејзината услуга ја барале и во Валкувија и во Валтравија и од Вал Дументина и од Вал Поверина.

За време на сезоната луѓето доаѓале од сите долини, седнувале на оградата да му се љубуваат на езерото, си откинувале по некоја малина од грмушките и ја викале женичката која умеела да прави мармалад.
  • Аполонија!
  • Што има?
  • Ќе ми сварите ли мармалад од боровинки?
  • На драго срце.
  • Ќе ми сварите ли мармалад од црни сливи?
  • Веднаш.
Таа женичка, Аполонија, имала просто златни раце и правела највкусни мармалади во областа на Верезе и на Кантона Тичино.
  • Аполонија, ќе ми направите ли мармалад?
  • Од ежиња?
Еднаш кај неа тошла една жена од Аркумеџа, толку сиромашна што за мармалад немала дури ни ќесе со кајсии и затоа патем си го наполнила скутот со зелени костени, што прилегале на ежиња.
  • Немам друго...
  • Добро, ќе се обидам.
И Аполонија така се зафатила што од зелените костени направила чудесен мармалад.
Другпат таа женичка од Аркумеџа не нашла дури ни костени, зашто паѓајќи, сувите лисја ги покриле. Затоа пристигнала со полн скутник коприви.
  • Аполонија, ќе ми направите ли мармалад?
  • Од коприви?
  • Не најдов друго...
  • Ех, добро, ќе видиме што ќе излезе.
И Аполонија ги зела копривите, ставила шеќер, ги сварила како што знаела и направила таков мармалад, да си ги лижеш прстите.
Зашто таа женичка, Аполонија, имала златни раце и би можела да направи мармалад и од камења.
Еднаш оттаму минал императорот, па и тој побарал да го проба мармаладот на Аполоноја. Таа му подала една чинија, но императорот по првата лажица се намуртил, зашто внатре била падната една мува.

  • Ме одвраќа – рекол императорот.
  • Ако не е вкусен мармаладот, мувата немаше да падне внатре – рекла Аполонија.

Но  императорот веќе се разгневил и им заповедал на војниците да ѝ ги пресечат рацете на Аполонија.
Тогаш луѓето се побуниле и порачале да му кажат, ако ѝ ги пресечат рацете на Аполонија, тие ќе му ја пресечат круната заедно со главата, зашто императорски глави се наоѓаат под пат и над пат, но раце како на Аполонија, поскапи се и поретки.
И императорот требало да ги обере крушите...

Wednesday, June 18, 2014

Аудио миксање кај локалните и националните телевизии

Незнам за тебе, ама мене ужасно ми смета разликата во гласноста на аудио сигналот помеѓу емисија и рекламен блок.
Има ли некој што се грижи за ова во телевизииве, односно има ли некој што го нивелира волуменот на звукот за да ги доведе до приближно иста гласност емисиите на телевизииве?

Обично рекламите се изјачани до максимум, а остатокот од програмата е тивок, па со далечинското сум како пред стариот добар флипер кога ја играм атлетиката "Hyper Olympics".
Има ли диџеи во телевизииве што ги миксаат аудио каналите на видео секвенците за да нема голема разлика во гласноста?

Over & Out

Friday, April 4, 2014

Me, myself and I


На 12-13 Април годинава ќе се одржи натпревар именуван како „НАСА спејс апс челинџ“ (NASA Space Apps Challenge). На мое големо задоволство организаторот ме покани да бидам еден од менторите на тимовите учесници што ќе треба да издржат хакатон на кој ќе треба да реализираат софтверски/електронски решенија.

Денеска (03.Април) се одржа првата од двете планирани сесии на која членовите на тимовите имаа прилика да запознаат дел од менторите.

Овој пост го пишувам како дополнување на моето претставување со желба да им се помогне на тимовите што ќе треба да пројават интерес за менторска асистенција, а во функција на поквалитетна реализација на решенијата што ќе ги изработуваат.

Преку моево проширено претставување ќе се обидам да идентификувам важни сегменти/точки што сметам дека еден тим, учесник на настанот, треба сериозно да ги третира.
  • Избор на проектот/темата час поскоро
    Тимот треба да го одбере предизвикот вчера (да да вчера, не е грешка) и да знае што сака да направи (да биде свесен за најголем дел од работите што го очекуваат за реализација на проектот/решението).
    Сценариото во кое тимот ќе се дом'кне во сабота сабајле на местото на настанот и ќе почне да дискутира или да се прашува на што да работи, не звучи за добитна комбинација.

    Како јас планирам да помогнам? [подготовка, планирање, проактивност, иницијатива, желба за успех/победа, анализа, управување со време]

    Одберете го вистинскиот предизвик, притоа внимавајте тоа да биде комбинација од тоа да имате доминантно познавање од темата што ја одбирате (деловна, функционална, техничка перспектива) и да ви биде доволно „секси“ за да имате екстра енергија и волја на располагање што обично се појавува во сценарија во кои работите на нешто за кое навистина имате интерес. Јас ќе ви помогнам:
    • да направиме декомпозиција на предизвикот и решението за подобро да го „свариме“ и да ги идентификуваме потенцијалните проблеми/предизвици;
    • да се организираме што е можно подобро за секој да добие вистинска задача;
    • да ја направиме вистинската секвенца на настани при реализација на решението;
    • да воведеме паралелизам во работењето и
    • оптимално да го потрошиме и онака краткото време на располагање - сметај те го ова за еден од најважните сегменти
  • Прво дизајн па потоа кодирање
    Најпрвин да се дизајнира решението (подготовка на mock-up), па потоа да се кодира.

    Како јас планирам да помогнам? [анализа, технички одлуки - архитектура, brainstorming сесии]
    Можам да помогнам во давање насоки како да се движи размислувањето при дизајнирањето на системот и расчистувањето на дилемите што ќе се појавуваат во тој процес. Ќе бидам и самиот присурен некое време на сесиите на разработување на решението и во функција на оној што ќе управува со сесијата (за да нема долги, забегани и сувишни дискусии), но би можел да бидам и како технички ментор во зависност од платформите и технологиите што ќе ги одбере тимот за имплементација на решението. (мои најблиски платформи  и оние со кои се осеќам најкомотен се оние на Microsoft - Windows Server како ултимативна платформа, Internet Information Services и MS SQL)
  • Луѓето сакаат прикаски
    На натпреварот ќе се прават софтверски решенија. Убеден сум дека никој од оние што ќе ги бодуваат решенијата нема да го интересира колку добар код е напишан и какви елегантни алгоритми се користени при имплементација. Жири комисијата и присутните ќе ги интересира што е „приказната“ позади тој код и што тој придонесува во средината за која е наменет - каква преносна вредност има тој код.

    Како јас планирам да помогнам? [евангелие за проектот/идејата, функционална/деловна вредност на решението]
    Некој треба да се „вртка наоколу“ и да раскажува за идејата и проектот, да ги споделува информациите за работата, да одбере таргет група на која ќе и се обрати, а со тоа да создаде оние што ќе ја поддржат идејата и нејзината реализација. Ова важи и за жири комисијата и за учесниците, посетителите на настанот, па и за јавноста.
    Јас би можел да помогнам во тој дел.
  • Содржината е секогаш важна
    Во дел од предизвиците постои можност да се користат податоци што ги обезбедува главниот организатор на глобалниот настан, а тоа е NASA. Решението што ќе се реализира според мене треба да ги користи токму овие податоци, а не инпровизации и тест податоци.

    Како јас планирам да помогнам? [интеграција со надворешни системи]
    Според мене ова е важен сегмент и треба да се третира сериозно уште во фазата на подготовка. Да се идентификуваат вистинските сервиси(извори на податоци), да се идентификува соодветниот член од тимот што ќе научи за интеграцијата помеѓу двете решенија/системи (API на сервисот што претставува извор на податоци (data service provider)) и ќе може во крајна линија и да го реализира сегментот што ќе ги поврзува двете решенија.
    Јас би можел да бидам покрај оној што ќе ја има оваа задача и ќе бидам достапен за комуникација и тогаш кога физички нема да бидам присутен на локацијата на која ќе се одржува настанот (канали за коминикација: e-mail, Skype, fb, twitter).
  • Идентификување графички дизајнер во тимот
    Очите се важен „input device“ на луѓето преку кои тие добиваат информации, а жири комисијата, присутните и јавноста ќе може да го види корисничкиот интерфејс, а не изворниот код (барем јас во оваа прилика не би покажувал и објаснувал изворен код). Естетиката и употребливоста (usability) на решението е нешто што може да има големо влијание над жири комисијата/присутните и јавноста за тоа како ќе го оценат/коментираат она што ќе биде презентирано/демонстрирано од тимот. Ако во тимот сеуште немате дизајнер (односно некој што ќе може да се посвети на корисничкиот интерфејс / презентациското ниво од решението), тогаш размислете тоа да го направите. Ако тоа не е можно, јас ќе ви помогнам да идентификуваме член од тимот што ќе ја има задачата на UI дизјанер.

    Како јас планирам да помогнам? [графички дизајн и дизајн на UI]
    Би можел да помогнам во идентификувањето на „UI и графичкиот дизајнер“ во тимот доколку тој претходно не е идентификуван. Јас би можел да помогнам во одлуките за тоа како сегменти од корисничкиот интерфејс да бидат направени или како да го одбереме најдобриот предлог.
  • Комплетно решение - затворена целина (end 2 end решение)
    Според мене потребно е проектот да се димензионира внимателно за да може да се затвори една функционална целина за предвиденото време за реализација. Нетреба да се претерува со визиите и со идеите за да може да се затвори компактна целина што ќе работи без проблеми и ќе испорачува функционална вредност.

    Како јас планирам да помогнам? [управување со проект]
    Реализирање на одреден функционален обем што ќе функционира како целина, за дефинирано време и со конечно дефинирани ресурси што се на располагање се осовните перспективи/атрибути што ги третира управувањето со проекти (project management). Ова е димензија што несомнено ќе биде неопходна за да се реализира посакуван резултат (победа). Ова е сегмент во кој исто така можам да помогнам.

Јас сум Васил Буралиев,
со професионална кариера од 13 години како веб програмер, веб дизајнер, софтверски инженер/архитект во МОЛ, Сивус и Манор и поранешен ИТ директор, ко-основач и ко-сопственик на Ре-актив и Феникс Интерактив.
Во моментот на пишување на овој пост работам како ИТ проектен менаџер во Сингулар ДОО.




e-mail: vasil.buraliev@singular.mk,  vasil_buraliev@yahoo.com
Skype name: phantomot
LinkedIn: http://www.linkedin.com/in/vasbu
Twitter: https://twitter.com/VasilBuraliev
Facebook: https://www.facebook.com/vasil.buraliev

На сите натпреварувачи на настанот од лично име и од име на Сингулар им посакувам успех во учеството, а на мојот тим му посакувам победа.

Over & Out
https://www.youtube.com/watch?v=FJEzEDMqXQQ

Sunday, December 15, 2013

Најчесто идентификувани проблеми при развој на софтверски решенија





Искуството вреди да се сподели

 
 

Во саботата (14.12.2013) во просториите на ФОН Универзитетот се одржа Codecamp 2013 (најголемиот настан во Македонија посветен од и на заедницата со интерес за развој на софтверски решенија). На мое огромно задоволство имав сопствена сесија на тема „Продолжување на животниот век на софтверски инженер - најчести проблеми при реализација на софтверски решенија“ на која реализирав и една анкета со цел присутните да идентификуваат проблеми при развој на софтверски решенија и да ги приоретизираат потребите за нивно надминување/решавање.
 
Анкетните листови содржеа предефинирана листа со идентификувани проблеми при реализација на софтверко решение но беше оставена можност и да се допишат нови. За секој од идентификуваните проблеми постоеше и можност да се впише индекс за приоритет за нивно решавање со можни вредности од 1 до 5 (1 - највисок приоритет, 5 - најнизок приоритет).
 
Листата со идентификувани проблеми е креирана врз основа на претходна анализа во која учествуваа проектни менаџери (4), софтеврски архитекти (7) и деловни аналитичари (2).
 
Би сакал да им се заблагодарам на сите учесници во анкетата, како и на организаторите на Codecamp 2013 што овозможија реализација на анкетата како и на споменатата сесија.

Следат резултатите од анкетата.
 
Анкета спроведена на: Codecamp 2013 - 14.Декември.2013
Вкупно присутни на сесијата на која е спроведена анкетата: ~ 60
Вкупен број анкетирани: 24
Анкетирани според работна позиција: софтверски програмери со различен сениоритет и задолженија, софтверски архитектури, шефови на одделенија за развој на софтвер, раководител на ИТ, советник на информатика, студенти

Индекс на приоритет за справување со идентификуван проблем; во интервјуираните има софтверски програмери, софтверски архитекти, шефови на сектори за софтверски развој, советници за информатика и студенти; вкупен број анкетирани 24;

Индекс на приоритет за справување со идентификуван проблем; во интервјуираните има шефови на сектори за софтверски развој, раководител на ИТ и советник по информатика советници за информатика; вкупен број анкетирани 4;
Индекс на приоритет за справување со идентификуван проблем; во анкетираните има софтеврски програмери со различен степен на сениоритет, софтверски архитекти; вкупен број анкетирани 14;
 
Индекс на приоритет за справување со идентификуван проблем; анкетираните не ја евидентирале сопствената позиција; вкупен број анкетирани 7;

Дополнителни ресурси

На сесијата можев да забележам дека некои од посетителите се обидуваа да ги фотографираат последните слајдови што имаа листи на препорачани ресурси поврзани со тамата но и надвор од неа. Во оваа прилика и во овој пост ги споделувам последните слајдови со тие содржини.

Once upon Atari; 12 Weeks with Geeks; How a Geek Changed the World; Revolution OS;

How to think like Leonardo da Vinci; Running lean; Conversations: The Future of Software Engineering; Music Habits: 101 Music Production Tips

ALM Summit; ALM Forum; Magic Quadrant for Application Life Cycle Management; Lean Canvas

Слична сесија беше реализирана во Септември 2013 во рамките на редовните средби на MK .NET Users групата.

Saturday, October 12, 2013

Штрумфови 2, синхронизација на Македонски јазик, бесценето

Ако немате идеја што да правите утре во првата половина од денот, однесете го синот/ќерката/внукот/внуката во кино.
Гледајте го Штрумфови 2. Одлична детска приказна, феноменална реализација, македонска синхронизација - бесценето.
Во оваа прилика би сакал да ги пофалам иницијаторите, инвеститорите и реализаторите на синхронизацијата на Македонски јазик. Одлично реализирано! Незнам колкав финансиски ефект ќе постигнат со овој анимиран филм и неговата синхронизација на Македонски, но би сакал да ги уверам дека дел од граѓаните навистина го почитуваат и ценат тоа што го направиле и очекувањата се да има содржини за деца на Македонски јазик и во кината повеќе и континуирано.
Се надевам и дека сите мои истомисленици ќе ја потврдат поддршка со посета на овој цртан филм во кината со нивните блиски за да го затвориме кругот.

Актерската екипа за гласовите на Македонски е следнава: Никола Ристановски, Зорица Панчиќ, Сашко Коцев, Дејан Лилиќ, Гораст Цветковски, Нино Леви, Ѓокица Лукаревски, Гоце Тодоровски, Томе Витанов, Петар Арсовски, Јана Руси, Борче Начев, Александар Алексовски, Розета Арсова, Трајче Ѓеоргиев
Одлични актери!

Трејлер од цртанот со синхронизацијата на Македонски може да го видите овде.

Цртаниот го има на репертоарот во кино Милениум, Cineplexx.


Monday, September 9, 2013

ВБУ музички регистар: информации и критики за музичките албуми од Македонија на веб


Потреба за квалитетно бранување на емоциите
Технички информации за
еден музички албум
Повеќе од една година знам да поминам во некоја од продавниците што продаваат музика (обично тоа е во ГТЦ) и да прашам што има ново од домашната продукција. Често знам да си купам неколку ЦД-а со нешто ново или нешто постаро што не сум го слушал, а ми изгледа привлечно и сакам да го преслушам.

Пред да си ветам себеси дека од време на време ќе влегувам во продавница и ќе си купувам музика (читај пред повеќе од една година ), музиката што ја слушав години наназад беше онаа што ќе ми ја пуштат на локалните телевизии и радија, а не онаа јас што ќе си ја одберам. Тоа почнав да го менувам па се потсетив на бендови од младоста и проверив како тие се развивале годините во кои мојот интерес за музиката беше сведен на минимум. Дополнителен интерес и желба имав да разберам каква е актуелната состојба на домашната музичка продукција.
Со оглед на тоа што нашата продукција не е многу голема (лична проценка е дека се неколку десетици албуми годишно), возможно е човек целата продукција да ја следи. Откако ги купив албумите што ми беа примарен фокус на интерес, почнав да ги купувам и да ги наоѓам (во главно на download и streaming сервисите на Интернет) оние за кои имав помалку иницијален интерес.
Некои од албумите што ги преслушав ми се допаднаа многу.
Во оваа прилика ќе ги издвојам само следниве три и покрај тоа што оние што навистина ми се допаѓаат се повеќе. (овде има поширока листа при крајот на текстот)
Креативен нагон, потреба за создавање, љубов кон технологијата, важноста на творештвото
Пред, од прилика, половина година добив желба да направам попис на музичките албуми од домашната продукција, за неколку години наназад. Оваа идеја/желба ја имале и други и многу порано. Јас знам дека имало барем неколку иницијативи што ги обединувала истата или слича идеја во последниве 15-тина години. Некои од нив и со реализација што после одреден временски период престанале да постојат. (еден пример на кој можам да се сетам и за кој сум јас свесен е www.muzika.net на Methamorfosis)


почетна страна (home page) со
попис на последни објавени
албуми 
Пред неколку месеци, без голем притисок, почнав да скицирам систем што треба да вклучува веб-базирано решение што ќе понуди информации за музичките албуми од домашната продукција и домашните автори. Пробував да димензионирам целина што ќе може да се реализира релативно брзо и ќе биде ефтина за изведба, а воедно ќе може да понуди некаква вредност на оние што имаат интересе за музичкото творештво од Македонија.

Во моментот на пишување на овој пост, развојот на вебсајтот е во напредна фаза и планирам негово објавување во некоја блиска иднина.

ВБУ музичкиот регистар
(работниот назив на оваа иницијатива) претставува неформален музички регистар на музичките албуми од домашната продукција и музички автори од Македонија со независна уредувачка политика за објавување на албумите.


Иницијален опфат на содржини и функционалности
На вебсајтот, барем во неговото иницијално издание, ќе може да се добијат следниве информации / услуги:
Целосен преглед на податоци
за музички албум што вклучува
технички податоци и критка
  • Преглед на кратки информации за последните објавени музички албуми
  • Можност за пребарување на целиот регистар на евидентираните музички албуми
  • Целосен преглед на технички податоци за музички албум (издавач, датум на издавање, листа на песни, илустрација од омотот, автори и соработници во албумот, музичка класификација)
  • За некои од албумите ќе има и критика (пишана форма и во форма на индекс)
  • Филтрирање на музичките албуми по неколку различни критериуми
  • Топ листи на музички албуми според различни критериуми
  • Интерфејс за поднесување информации за музички албум, нивна проверка и објавување според независната уредувачка политика на сервисот
  • Интеграција со Twitter и Facebook (можност за делење на страниците со деталите за албумите преку Twitter и Facebook, како и можност за коментирање за секој од евидентираните албуми)

Би ми било исклучително корисно и ќе му бидам благодарен на секој оној што ќе ми испрати одговор на следново прашањето:
Што дополнително би сакале да понуди ВБУ музичкиот регистар? (доколку сте расположени, вашите одговори ги очекувам на
vasil_buraliev@yahoo.com)



Филтрирање на музичките албуми
Техничка перспектива
Вебсајтот е базиран на DotNetNuke платформата за која се развива посебен модул со цел да ги овозможи предвидените функционалности за ажурирање, пребарување и прикажување на информациите за музичките албуми.

Што е следно?
  • Регрутирање на стручни соработници
  • Објава на конкурс за лого на сервисот
  • Евидентирање на повеќе десетици музички албуми во регистарот
  • Планирање за објава на вебсајтот и негово промовирање во јавноста
Over & Out